ಕಾಸರಗೋಡಿನ ಚಿತ್ತ, 36ರತ್ತ...

ಇಂದಿಗೆ ಸುಮಾರು 36 ವರ್ಷದ ಹಿಂದೆ. ಅಂದರೆ 1984ರ ಮೇ ತಿಂಗಳ 24 ನೇ ದಿನಾಂಕ. ಗಡಿನಾಡು ಕಾಸರಗೋಡಿನ ಪಾಲಿಗೆ ಅದು ಮರೆಯಲಾಗದ ದಿನ. ಯಾಕೆಂದರೆ 1956ರ ಪ್ರಾಂತ್ಯ ಪುನರ್ವಿಂಗಡನೆಯ ಬಳಿಕ ಕೇರಳ ರಾಜ್ಯವು ಇದೇ ದಿನ ಉತ್ತರ ಭಾಗದ ಸಂಯುಕ್ತ ಪ್ರದೇಶಗಳನ್ನು ವಿಭಜಿಸಿ ಕಾಸರಗೋಡನ್ನು ಹೊಸ ಜಿಲ್ಲೆಯಾಗಿ ಘೋಷಿಸಿತು. 70 ಮತ್ತು 80ರ ದಶಕವು ಕಾಸರಗೋಡಿನ ಕನ್ನಡ ಹೋರಾಟದ ಸಕ್ರೀಯ ಕಾಲವಾಗಿತ್ತು. ಆ ದಿನಗಳಲ್ಲಿ ತೀವ್ರ ಸ್ವರೂಪ ಪಡೆಯುತ್ತಿದ್ದ ಕನ್ನಡಿಗರ ಹೋರಾಟದ ಏಕೈಕ ಗುರಿ ಮಹಾಜನ ವರದಿ ಅನುಷ್ಠಾನ ಮಾತ್ರ ಆಗಿತ್ತು. ಆದರೆ 1956ರಲ್ಲಿ ಫಜಲ್ ಅಲಿ ನಿಯೋಗದ ಮೂಲಕ ಕೆ.ಎಂ ಪಣಿಕ್ಕರ್ ತಂದುಕೊಟ್ಟ ಕಾಸರಗೋಡನ್ನು ಕರ್ನಾಟಕಕ್ಕೆ ಬಿಟ್ಟುಕೊಡಲು ಕೇರಳ ರಾಜ್ಯವು ಸಿದ್ದವಿರಲಿಲ್ಲ. ಕಾಸರಗೋಡಿನ ಹೋರಾಟ‌ ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿದ್ದಂತೆ ಕೇರಳದ ಆಡಳಿತಶಾಹಿಗಳು ಉತ್ತರ ಕೇರಳದ ಜಿಲ್ಲೆಯನ್ನು ವಿಭಜಿಸಿ ಕಾಸರಗೋಡನ್ನು ಹೊಸ ಜಿಲ್ಲೆಯಾಗಿ ಘೋಷಿಸಿತು. ಆ ಮೂಲಕ ಕಾಸರಗೋಡಿನ ಕನ್ನಡಿಗರ ಹಿತಾಸಕ್ತಿಗಳನ್ನು ತಾವು ಕಾಪಾಡಿಕೊಳ್ಳುವೆವು ಎಂಬ ಹುಸಿ ಭರವಸೆ ಮೂಡಿಸುವ ಯತ್ನ ಮಾಡಿತು. ಆದರೆ ಹೊಸದಾಗಿ ಜಿಲ್ಲೆ ರೂಪುಗೊಂಡಾಗ ಅಲ್ಲಿಯೂ ಕಲಬೆರಕೆ ಕಂಡಿತು. ಏನೆಂದರೆ, ಜಿಲ್ಲೆಯಲ್ಲಿ ಕನ್ನಡ ಮಾತನಾಡುವ ಪ್ರದೇಶಗಳ ಜೊತೆಗೆ ಮಲೆಯಾಳಂ ಪ್ರದೇಶಗಳನ್ನು ಸಮಪ್ರಮಾಣದಲ್ಲಿ ಬೆರೆಸಿತು‌. ಆದರೂ ಕನ್ನಡಿಗನಿಗೆ ಅದೊಂದು ತಾತ್ಕಾಲಿಕ ಆಶ್ವಾಸನೆಯೇ ಆಗಿತ್ತು. ಮಂಜೇಶ್ವರವನ್ನು ಒಳಗೊಂಡಿದ್ದ ಅವಿಭಜಿತ ಕಾಸರಗೋಡು ತಾಲೂಕಿಗೆ ಕನ್ನಡ ಭಾಷಾ ಅಲ್ಪಸಂಖ್ಯಾತರ ಪ್ರದೇಶ ಎಂಬ ಸ್ಥಾನ ನೀಡಿ ಕೇರಳ ಸರಕಾರ ಆಜ್ಞೆಯಾಯಿತು. ಇದರ ಪರಿಣಾಮವಾಗಿ ಮಹಾಜನ್ ವರದಿ ಅನುಷ್ಠಾನಕ್ಕಾಗಿ ನಡೆಯುತ್ತಿದ್ದ ಹೋರಾಟ ಅಶಕ್ತವಾಯಿತು. ಇದರ ಪರಿಣಾಮವೆಂಬಂತೆ ಸಾಂಸ್ಕೃತಿಕ ಕನ್ನಡದ ವಿನಾಶ ಆರಂಭವಾಯಿತು. ಕಾಸರಗೋಡಿನ ಕನ್ನಡದ ಕಿಚ್ಚು ರಾಜಕೀಯ ಪಕ್ಷಗಳ ವೋಟ್ ಬ್ಯಾಂಕ್‌ನ ಭಾಗವಾಯಿತು. ಚುನಾವಣೆ ಬಂದಾಗ ಕಾಸರಗೋಡಿನಲ್ಲಿರುವ ರಾಜಕೀಯ ಪಕ್ಷಗಳ ಪಾಲಿಗೆ ಕನ್ನಡವೇ ಬ್ರಹ್ಮಾಸ್ತ್ರ. ಚುನಾವಣೆ ಕಾಲದಲ್ಲಿ ಕಾಸರಗೋಡು ಕನ್ನಡದ ರಾಜಧಾನಿಯಂತೆಯೂ, ರಾಜಕಾರಣಿಗಳು ಕನ್ನಡ ಕುವರರೋ ಎನ್ನುವಂತೆ ಕಂಗೊಳಿಸುತ್ತಾರೆ. ರಾಜಕೀಯ ಪಕ್ಷಗಳ, ಸ್ಪರ್ಧಿಗಳ ಫೇಸ್‌ಬುಕ್‌ ಪುಟಗಳು ಕನ್ನಡಮಯವಾಗಿರುತ್ತದೆ. ಅಲ್ಲಿ ಬರೆದ ಕನ್ನಡದ ಅಕ್ಷರಗಳು ವ್ಯಾಕರಣ ಬದ್ಧವಾಗಿರುತ್ತದೆ, ವರ್ಣರಂಜಿತವಾಗಿರುತ್ತದೆ. ಆದರೆ ಆ ನಾಟಕಕ್ಕೆ ಚುನಾವಣೆಯ ಫಲಿತಾಂಶ ಹೊರಬಂದೊಡನೆ ತೆರೆಬೀಳುತ್ತದೆ. ಮತ್ತೆ ಕನ್ನಡ ಎಂದರೆ 'ಎನ್ನಡ' ಎನ್ನುತ್ತಾರೆ. ಕಾಸರಗೋಡು ಎಂದರೆ ಇದು ನಿಮ್ಮ ಕಾಸರಗೋಡು ಅಲ್ಲ...., 'ಕಾಸ್ರೋಡು' ಅಂತ ಹೇಳ್ತಾರೆ. ಆದರೆ ಇಂದು ಚುನಾವಣೆಗಳಲ್ಲಿ ರಾಜಕೀಯ ಪಕ್ಷಗಳ ಕೇಂದ್ರ ಸಮಿತಿಗಳ ಪ್ರಭಾವದಿಂದಾಗಿ ಕನ್ನಡ ಬಾರದ ಅಭ್ಯರ್ಥಿಗಳು ಚುನಾವಣೆಗಳಲ್ಲಿ ಗೆಲ್ಲುತ್ತಿದ್ದಾರೆ. ಕಾಸರಗೋಡು ಜಿಲ್ಲೆ ರೂಪೀಕರಣವಾಗಿ 36 ವರ್ಷ ಆದರೂ ಕೇರಳ ಸರಕಾರದಿಂದ ಜ್ಯಾರಿಗೊಳ್ಳುವ ಮಲೆಯಾಳಂ ಭಾಷೆಯ ಸುತ್ತೋಲೆಗಳು, ಆದೇಶಗಳನ್ನು ಕಾಸರಗೋಡಿನ ಕನ್ನಡಿಗರಿಗೆ ತಲುಪಿಸಲು ಯಾವುದೇ ಭಾಷಾಂತರ ಅಕಾಡೆಮಿ ಅಸ್ತಿತ್ವದಲ್ಲಿಲ್ಲ. ಕಾಸರಗೋಡಿನ ಕನ್ನಡಿಗರಿಗೆ ವಿತರಿಸುವ ಆಧಾರ್ ಚೀಟಿಯಲ್ಲಿ ಮಾಹಿತಿ ನಮೂದಾಗಿರುವ ಪ್ರಾದೇಶಿಕ ಭಾಷೆ ಮಲೆಯಾಳಂ. ಪಡಿತರ ಚೀಟಿಯಲ್ಲಿ ಮಾಹಿತಿಗಳೆಲ್ಲಾ ದಾಖಲಾಗಿರುವ ಏಕೈಕ ಭಾಷೆ ಮಲೆಯಾಳಂ, ಪಡಿತರ ಖರೀದಿಸಿದಾಗ ನೀಡುವ ರಸೀದಿಯೂ ಮಲೆಯಾಳಂ ಮಯಂ. ಮತದಾರರ ಗುರುತಿನ ಚೀಟಿಯಲ್ಲೂ ಮಲಯಾಳಂ. ‌ಕೋವಿಡ್-19 ರ ವೇಳೆಯಲ್ಲಿ ಜಿಲ್ಲಾಡಳಿತದಿಂದ ಜನಜಾಗೃತಿ ಮೂಡಿಸುವ ಮಾಹಿತಿಗಳು ಮಲೆಯಾಳಂನಲ್ಲಿ ಪ್ರಕಟವಾಗುತ್ತಿತ್ತು. ಆದರೆ ಕನ್ನಡಿಗರ ಫೇಸ್‌ಬುಕ್‌ ಬೇಡಿಕೆಗಳ ಪರಿಣಾಮವಾಗಿ ಅಪರೂಪವಾಗಿ ಕೆಲವು ಮಾಹಿತಿಗಳು ಕನ್ನಡದಲ್ಲೂ ಪ್ರಕಟಿಸಲಾರಂಭಿಸಿದರು. ಆದರೆ ಕನ್ನಡ ಮಾಹಿತಿಗಳು ಪ್ರಕಟವಾದಾಗ ಅದು ಕೇರಳದಲ್ಲಿ ಜ್ಯಾರಿಯಲ್ಲಿರುವ ಮಾತೃಭಾಷೆ ಮಲೆಯಾಳಂ ಕಾನೂನಿನ ಉಲ್ಲಂಘನೆ ಎಂಬಂತೆ ಕೇರಳದ ಸಾರ್ವಜನಿಕರು ಕನ್ನಡಿಗರ ಹಿತಾಸಕ್ತಿಗಳನ್ನು ದಮನಿಸುವ ಪ್ರಯತ್ನ ಮಾಡುತ್ತಿದ್ದಾರೆ.